Այս հատորը՝ Գիրք Գ-ն, ամբողջական աշխատանքի վերջին բաժինն է: Այն ամփոփում է աշխատության 7-9 գլուխներում զետեղված նյութերը, որոնք վերաբերում են Հայկական Սփյուռքում տեղի ունեցած կարևոր իրադարձություններին, Սիրիայից Հայաստան տեղափոխված սիրիահայերի հետ տարված աշխատանքներին, նրանց հասարակությանը ինտեգրելուն, Արցախի իրավիճակին և Սփյուռքին ուղղված հորդորներին ու կոչերին՝ մասնակցելու Արցախի փրկության գործին:
Վերջին գլուխը նվիրված է տոնական, հոբելյանական շնորհավորանքներին՝ ուղղված անվանի հայերին, բարերարներին, զանգվածային լրատվամիջոցների և կրթական հաստատությունների տարեդարձներին, սփյուռքյան կառույցներին, ինչպես նաև տեղ են գտել հիշատակի խոսքեր՝ նվիրված հավերժի ճամփորդ դարձած վաստակաշատ հայորդիներին:
Գրքի Ա և Բ հատորներում հիմնականում տեղ են գտել 2008-2018 թթ. Հայաստանի Հանրապետության Կառավարության և մասնավորապես ՀՀ սփյուռքի նախարարության կողմից վարված Հայաստան-Սփյուռք գործակցության քաղաքականության հիմնական սկզբունքներին, ծրագրերին, իրականացված ձեռնարկներին նվիրված հեղինակի հոդվածները, ելույթները: Ամփոփվել են Հայաստան-Սփյուռք համահայկական համաժողովներում հեղինակի զեկուցումները, ելույթները, առանձնակի տեղ է հատկացվել հայագիտության հիմնախնդիրներին նվիրված միջոցառումներին, մասնագիտական համաժողովներին, Հայոց ցեղասպանության 100-րդ տարելիցի տարածաշրջանային հանձնախմբերի աշխատանքներին, հայկական կառույցների հետ գործակցությանը, ինչպես նաև տարածաշրջանային հայկական համայնքների ներկայացուցիչների հետ հանդիպումներին, համայնքներում հեղինակի ունեցած ելույթներին:
Գիրքը կարող է օգտակար լինել Սփյուռքի համայնքների ղեկավարների, սփյուռքյան կառույցների ներկայացուցիչների, սփյուռքագետների, պատմաբանների, հետազոտողների համար: Այն նախատեսված է նաև հասարակական գործիչների, ընթերցողների լայն շրջանակի համար:
