«Հայ ժողովրդական հեքիաթներ» եռահատորում ընդգրկված հեքիաթներն ընտրվել են 19-20-րդ դարերում և 21-րդ դարասկզբում բանահավաքների նյութերից կազմված մի քանի տասնյակ ժողովածուներից: Լայն հասարակությանն ավելի մատչելի դարձնելու համար դրանք տարբեր բարբառներից փոխադրվել են գրական հայերենի՝ որոշ չափով պահպանելով ժողովրդական բառուբանը և հավատարիմ մնալով բնագրին: Հատորներում ընդգրկված մի քանի հեքիաթներ կազմվել են նույն հեքիաթի տարբերակներից՝ որպես համահավաք: Ընտրելիս նախապատվությունը տրվել է այն հեքիաթներին, որոնց գլխավոր մոտիվներն ընդհանուր են Մեծ Հայքի տարբեր նահանգների բանահյուսական նմուշներում, նաև այն հեքիաթներին, որոնք մեր հասարակությանն անծանոթ են, սակայն շատ արժեքավոր. թաքնված գանձեր, որոնք նորովի են մեզ ճանաչեցնում հայ ժողովրդի մտածելակերպը, հոգևոր և մշակութային ժառանգությունը: Այս հեքիաթներն այսօր էլ ուսանելի են ու արդիական: Վստահ ենք, որ դրանք մեծ հետաքրքրություն կառաջացնեն թե՛ փոքրերի և թե՛ մեծերի շրջանում: *Գրքի գեղարվեստական ձևավորման հիմքում հայկական գորգանախշերն են: