«Դահուկներով՝ Գրենլանդիայով» գիրքը պատմում է նորվեգացի հայտ-նի բևեռախույզ, ականավոր գիտնական, գրող, խաղաղության Նոբելյան մրցանակի դափնեկիր Ֆրիտյոֆ Նանսենի Գրենլանդիա կատարած գիտարշավի մասին: Գրենլանդիան առաջինը հատած արշավախմբի նվաճած գիտական բարձր արդյունքները նոր էջ բացեցին բևեռային հետազոտությունների պատմության մեջ։ Նանսենի մտահղացումը չափազանց համարձակ էր, և մամուլը թերահավատորեն էր վերաբերվում «Բերգենյան թանգարանի կոնսերվատոր Նանսենի» նախագծին: Բայց Նանսենի փայլուն հաջողությունը բացեց դեպի մերձբևեռային շրջան ճանապարհորդություն իրականացնելու ուղին: «Էսկիմոսների կյանքը» գիրքը բովանդակային առումով նախորդի՝ «Դահուկներով՝ Գրենլանդիայով» գրքի շարունակությունն է, որտեղ Նանսենը հիացմունքով նկարագրում է էսկիմոսների կյանքի պատկերը, դաժան ու անհավասար պայքարն անհյուրընկալ բնության դեմ և նրա հաղթանակն այդ պայքարում։ Մի ամբողջ ձմեռ ապրելով էսկիմոսների խրճիթներում՝ նա նկարագրում է նրանց դժվար աշխատանքի, սովորույթների, հավատալիքների մանրամասները՝ դրանք փրկելով մոռացությունից: