«Բեմբի. Անտառային կյանքի պատմություն» վեպը գերմանախոս ավստրիացի գրող Ֆելիքս Զալտենի (1869–1945) ամենահայտնի ստեղծագործություններից է։ Այն առաջին անգամ հրատարակվել է 1923 թվականին Ավստրիայում գերմաներենով։ Գիրքը մեծ ճանաչում է ձեռք բերել և թարգմանվել է բազմաթիվ լեզուներով։Հատկապես 1942 թվականին Ուոլտ Դիսնեյի կողմից ստեղծված «Բեմբի» անիմացիոն ֆիլմը նպաստել է գրքի համաշխարհային հանրաճանաչությանը։ Չնայած ֆիլմի սկզբնական ցուցադրությունները հաջողություն չեն ունեցել, հետագա տարիներին այն դարձել է հայտնի ու արժանացել է մի շարք մրցանակների։ Այս բարի գիրքը ոչ ոքի անտարբեր չի թողնի: Բեմբիի կյանքն անցնում է երջանիկ և անհոգ: Մայրիկը նրան շրջապատում է ջերմությամբ, հոգատարությամբ և սիրով: Բեմբին ընկերանում է անտառի տարբեր կենդանիների հետ, հետևում է թիթեռների թռիչքին, ինչպես նաև խաղում հյուր եկած զույգ ձագերի՝ Գոբոյի և Ֆալինեի հետ: Բայց մի օր անտառի բնակիչների հանգիստ, խաղաղ և կանոնավոր կյանք է ներխուժում Նա: Եվ Բեմբին, որը դեռ նոր է սկսում իր կյանքի ճանապարհը, կորցնում է մայրիկին և մնում է մենակ: Սակայն առաջնորդը, որը հետևում է փոքրիկին, դժվար պահերին միշտ նրա կողքին է՝ օգնելով հասունանալ և ճանաչել կյանքի օրենքները: