«Երբ սէրն ի յաշխարս եկավ,

եկավ իմ սիրտս բնակեցավ».

․․․ Միջնադարյան սիրելի հայրենը՝ հանճարեղ խտացումով ու հմայական զորությամբ դարերի խորքից սահմանում է սիրո, արարչության ու մարդու կապը: Չկա արարում ու կյանք առանց սիրո: Սիրո պակասն ու սիրուց ծնված երջանկության վայելքը, սիրված լինելու բարեբախտությունն ու սիրելիին բանաստեղծորեն գովերգելու ձգտումը հնագույն ժամանակներից մինչ օրս ծնունդ է տվել ու տալիս արվեստի ամենատարբեր գործերի և, իհարկե, բանաստեղծության:

Հայ գրականությունն էլ անմասն չի մնացել սիրային ներկապնակի բազմազան գույներից: Ստեղծվել են հարյուրավոր չքնաղ բանաստեղծություններ. խաղիկ ու հայրեն, տաղ, երգ ու բանաստեղծություն: Սիրո անպակաս լինելու մաղթանքով էլ «Զանգակ» հրատարակչությունն իր ավանդական՝ «Ոչ մի շաբաթ առանց բանաստեղծության» շարքն այս տարի շարունակում է «Ոչ մի շաբաթ առանց սիրո բանաստեղծության» գրքով: Ընթերցողն այստեղ կգտնի սերը ներկայացնող, գովերգող սիրային ծանոթ ու անծանոթ, դասական ու ժամանակակից բանաստեղծություններ, երգեր դարձած գործեր: Նաև մեր բանաստեղծների սիրային նամակներ ու կենսագրության դրվագներ, որոնք կօգնեն ընթերցողին ավելի լավ ընկալել/պատկերացնել բանաստեղծության ծագման պատմությունը, ծանոթանալ հասցեատերերին: Թեև իմ խորին համոզմամբ, բանաստեղծությունը եթե հոգեհարազատ է դառնում մեզ, ուրեմն նրա ստեղծման կենսագրական ազդակների իմացությունն արդեն էական չէ:

Ժողովածուն սկսեցի կազմել համաճարակի առաջին ալիքի շրջանում, երբ զգացի, որքան շատ է սերը մարդկանց մեջ և շարունակեցի ու ավարտեցի պատերազմի շրջանում, երբ սիրո մեծ պակաս կար ու շատ դժվար էր սիրո մասին նույնիսկ խոսելը, էլ առավել՝ բանաստեղծություն կարդալը: Սակայն իմ անձնական ու գրականության փորձառությունը փաստում է, որ սիրո մասին պետք է խոսել, գրել, սերը խոստովանել, սիրային գործեր կարդալ հատկապես այն ժամանակ, երբ դժվար է, երբ ցավը խեղդում է, որովհետև սերը ապաքինող է ու սպեղանի և սիրո մեջ է գոյության գաղտնիքը:

Հայկ Համբարձումյան

Հունվարի 30-ին Զանգակ գրատանը տեղի ունեցավ «Ոչ մի շաբաթ առանց սիրո բանաստեղծության» գրքի շնորհանդեսը, որին ներկա էին պոետներ Հակոբ Մովսեսը, Հենրիկ Էդոյանը, Հուսիկ Արան, Արթուր Մեսրոպյանը և պոեզիայի սիրահարներ։

Հեղինակ՝ Շուշան Մարուքի

Լուսանկարները Մհեր Արշակյանի

Նյութի աղբյուր՝ https://www.vnews.am/