Երևանի և բազմաթիվ ընթերցողների սրտի ամենակենտրոնում է գտնվում «Զանգակ» գրատան «Աբովյան» մասնաճյուղը: Երկու հարկ՝ բերներբերան լցված գրքերով, արվեստով, սիրով, սուրճով և թեյով: Կատակում ենք, բերնեբերան լցված չէ. ունենք ազատ աթոռներ, որ դու գաս գիրք կարդաս, կամ էլ մի լավ միջոցառման մասնակցես, կամ սուրճ խմես, թեյ, կամ էլ երազես հեռավոր ճամփորդությունների մասին:
«Մեգամոլ Արմենիա»-ի մեր մասնաճյուղը տարիքով ամենափոքրն է, բայց չափերով ամենևին էլ փոքր չէ: Եթե ուզում ես մեր այս մասնաճյուղ այցելել, պիտի գաս «Մեգամոլ Արմենիա», բարձրանաս երկրորդ հարկ. այնտեղ մի սրճարան կտեսնես, ուրեմն արդեն մոտ ես, մի քիչ էլ առաջացիր: Հետո կլսես ձայներ. հասել ես՝ մեր աշխատակիցներն են. նոր գիրք են քննարկում, համեցի՛ր:
Հիմա քեզ նորից «Սինեմա սթար» կհրավիրենք, բայց նորից ոչ ֆիլմի համար, մտածի՛ր միայն գրքերի մասին: « Ռիո մոլ»-ի երկրորդ հարկում է գտնվում «Զանգակ» գրատան ամենագողտրիկ մասնաճյուղը:
Իսկ գիտե՞ս, որ «Զանգակ» գրատանը գիրքն ու թեյը արդեն մեկտեղվում են նաև «Ռիո մոլ»-ի «Զանգակ» թեյարանում:
Գալի՞ս ես կրկնապատկելու ընթերցանության հաճույքը:
Կոմիտասի պողոտայում չորս ապակեպատ շենքեր կան, տեսե՞լ ես: Դրանցից մեկը նույնպես լցված է գրքերով: Ու քանի որ այս շենքում է տեղակայված նաև «Զանգակ» հրատարակչությունն իր տպարանով, հնարավոր է հայտնվես նաև գրքաստեղծ աշխատանքի ամենակենտրոնում: Այս մասնաճյուղը տարիքով ամենամեծն է, բայց և ամենաշատն է հյուրընկալում փոքրիկ ընթերցողներին:
12 տարի անց՝ 2024-ին, Կոմիտաս մասնաճյուղը վերաբացվել է նոր շնչով․ այստեղ ևս կարող եք հյուրընկալվել ոչ միայն կարդալու, այլև մեկ բաժակ հաճելի սուրճի համար:
Եթե եկել ես «Դալմա գարդեն մոլ», բարձրացի՛ր երկրորդ հարկ՝ «Սինեմա սթար»: Ո՛չ, ո՛չ, ֆիլմ դիտելու չենք հրավիրում. գրքեր, միայն գրքեր: Քեզ հրավիրում ենք «Զանգակ» գրատան տաղավար, մի լավ գիրք կընտրենք քեզ համար, մի քիչ էլ կզրուցենք:
Մեր մասնաճյուղային ճանապարհորդությունն ավարտենք Աբովյան 7 հասցեում՝ «Զանգակ» թեյարանում: Այստեղ ամեն ինչ համեղ է և համեմված է սիրով: Ու հետո, ընթերցանության հաճույքն առավել մեծ է, երբ այն զուգակցվում է թեյախմությամբ:
Ահա այն բոլոր հասցեները, որտեղ կգտնես «Զանգակ» գրատուն, բայց դու արդեն մեր կայքում ես, ուրեմն արդեն «Զանգակ»-ում ես:
