Այսօր մեզ հետ ՄԻ ՔԻՉ կզրուցի բարի և սիրելի գրող, գրականագետ, «կատուների մասնագետ», «Հիսուսի կատուն» և «Առևանգում, որ ցնցեց կատուների քաղաքը» գրքերի հեղինակ Գրիգը:

1. Ի՞նչ ժամանակներում ենք ապրում, Գրիգ:
Որպես ՀՀ քաղաքացի շատ վատ, որպես գրող՝ երանելի: Շատ նյութեր կան, որոնց մասին կարելի է գրել: Ապահով երկրներում գրողները մի ամբողջ կյանք են ապրում, բայց չեն ապրում այստեղի մեկ օրվա կատարվածը: Հետաքրքիր է տեսնել՝ ինչպես են փոխվում մարդիկ, որոնք, թվում էր, չպիտի փոխվեին: Կարծում եմ՝ ինչքան ժամանակները խառն են, մարդիկ այնքան շատ են կարդում, գիրքը շատ դեպքերում գալիս է ցրելու մենությունը:

2. Դատարկության զգացողությո՞ւն, թե՞ ցավ:
Ամենադժվարը անվերջ վախենալն է, երբ վախը դառնում է քո մշտական ուղեկիցը:

3. Քո հերոսներից շատերը մի տեսակ մենակ են, չնայած, ըստ իս, միշտ ունեն տաքուկ, ջերմ զգացողություններ: Ի՞նչ ես կարծում՝ քո գիրքը կարդալուց հետո մարդիկ կփորձեն հեռո՞ւ մնալ մենակ լինելու զգացողությունից, թե՞ կսիրեն գեղարվեստական մենությունը:
Ընթերցողի աչքերով չեմ կարող ասել: Կարդացածս գրքերից շատերը համարվում են դեպրեսիվ, ծանր, բայց դրանք ինձ պոզիտիվ զգացողություններ են պարգևել. հավատացրել են, որ ես միայնակ չեմ, որ ինձնից առաջ եղել են մարդիկ, որոնք ապրել են իմ վախերի հետ և այլն: Հույս ունեմ, որ իմ հերոսները ևս օգնում են հաղթահարելու մենությունը և չեն խորացնում այն:

4. Ի՞նչ երաժշտություն ես լսում սովորաբար ու ի՞նչ ես մտածում քո սիրած երգերը լսելիս:
Երաժշտական կոնկրետ ճաշակ չունեմ, ամեն ինչ եմ լսում ՝ դասական երաժշտությունից մինչև ռեփ, բայց գրելու ժամանակ հիմնականում նույն բանն եմ լսում, կարող եմ ամիսներով միևնույն երաժշտությունը լսել. կողքի աղմուկներից ազատվելու համար լավ տարբերակ է:

5. Գրիգ, երազանքներն ավելի շատ օգնու՞մ են, թե՞ խանգարում:
Չգիտեմ՝ ավելի շատ օգնո՞ւմ են, թե խանգարում: Ես սիրում եմ երազել: Երազելն ու սուտ խոսելը կարևոր բաներ են գրողի համար:

6. Գրիգ, Հիսուսի կատուն թարգմանվեց գերմաներեն և շահեց մրցանակ: Կուզեի մի փոքր պատմեիր զգացողություններիդ մասին:
Ես ոգևորված եմ ու ավելի շատ եմ գրում հիմա:

7. Կա՞ գիրք հայ ժամանակակից գրականությունից, որ կուզեիր դու գրած լինեիր, Գրիգ:
Շատ են:

8. Ազատության զգացողությու՞նը:
Եթե ինչ-որ բան չես ուզում, պետք է չանես, այսպես եմ պատկերացնում ազատությունը, բայց ես այն չունեմ:

9. Ի՞նչն է պակասում հայ ժամանակակից գրողին ու ի՞նչ չի անում հրատարակիչը:
Ավելի շատ է պետք թարգմանել և ներկայացնել հայ դասական և ժամանակակից գրողներին:

10. Ի՞նչ կարդամ ես:
Փինչընի «Ձգողության ծիածանը», դու էլ տանջվիր:

11. Հարց հաջորդ հյուրին:
Մեր այս աշխարհը մի ուրիշ աշխարհի դրա՞խտն է, թե՞ դժոխքը: