Վիրտուալ իրականության՝ VR ակնոցի միջոցով այսօր կարող եք հյուր գնալ Վիլյամ Սարոյանի տուն՝ շնորհավորելու մեծ գրողի տարեդարձը։
Գրող, բարի հսկա Վիլյամ Սարոյանն այսօր կդառնար 112 տարեկան։ Այդ առիթով «Վերածնունդ» մշակութային և ինտելեկտուալ հիմնադրամը Վիլյամ Սարոյանի տուն-թանգարանի նախագծի և #Saroyanweek-ի շրջանակում «Զանգակ» գրատանը սպասում է ընթերցասերներին։
«Զանգակ» գրատանը ներկայացված էին նաեւ Վիլյամ Սարոյանի գրաֆիկական աշխատանքների վերատպությունները։
Ցուցադրված աշխատանքները Կալիֆորնիայի համալսարանի հայագիտության ամբիոնի և «Forever Saroyan» ՍՊԸ-ի արխիվից են։
«Փորձում ենք Հայաստանում ապահովել սարոյանական ոգին, տուն-թանգարանի և «Վերածնունդ» մշակութային և ինտելեկտուալ հիմնադրամի էջերում մեկ շաբաթ է ակտիվ ներկայացնում ենք պատմություններ, որոնք ստացել ենք իր հարևաններից, ծանոթներից, այսինքն դրանք որևէ այլ տեղերում չկան։ Նաև Սարոյանի Երևան այցերի լուսանկարներն էինք տեղադրում՝ պահելով դրանք հենց նույն վայրում, որտեղ նա եղել է»,- «Ա1+»-ի հետ զրույցում պատմում է «Սարոյանի տուն-թանգարան» նախագծի հայաստանյան համակարգող Մերի Ղազարյանը։
Ի դեպ, սարոյանական գրականության սիրահարները կարող են լուսանկարվել նաեւ գրողի ավատարի հետ, որը տեղադրված է «Զանգակ» գրատան դիմաց։
Վերադառնալ
