2008 թվականից սկսած՝  Հովհաննես Թումանյանի ծննդյան օրը՝ փետրվարի 19-ը, նշվում է որպես գիրք նվիրելու օր։
Տարբեր կազմակերպություններ շատ տարբեր ու նույնիսկ անհատական մոտեցմամբ են օրը տոն դարձնում: 

Արդեն մի քանի տարի է, ինչ «Զանգակ» գրատունը փետրվարի 19֊ը անցկացնում է յուրովի՝ քայլ առ քայլ մոտենալով գիրք նվիրելու օրվան․ մի քանի տարի է, ինչ «Զանգակ» գրատունը ակտիվ մասնակցում է «Գաղտնի Թումանյան» խաղին, որը  լայն տարածում գտավ շատ կազմակերպություններում, ընկերական շրջաններում և նույնիսկ ընտանիքներում:
Փետրվարի 19֊ին անցկացվող միջոցառումներին հիմնականում մասնակցում է հասարակության ընթերցող մասը: Նախաձեռնությունն առաջին հերթին նպատակ ունի մեծացնելու գրքի մարդկանց շրջանակը: Այս դեպքում «Գաղտնի Թումանյան»֊ը դառնում է լավագույն առիթ և հնարավորություն մարդ֊գիրք նոր «ծանոթության»:

Ի՞նչ է «Գաղտնի Թումանյան»-ը:
Խաղի սկզբունքը նույն է, ինչ «Գաղտնի Ձմեռ պապ» խաղի դեպքում․ մասնակիցները պատահականության սկզբունքով ընտրում են անուն և դառնում այդ մարդու գաղտնի Թումանյանը, ով փետրվարի 19֊ին գրքային նվեր կանի իր «թոռնիկին»: Այս դեպքում ևս մինչև փետրվարի 19֊ը մասնակիցները «թոռնիկների» համար ընթացիկ֊թեմատիկ նվերներ են պատրաստում՝ պահպանելով գաղտնիությունը:
Հնարավոր է նաև նախապես առանձնացնել մի քանի գրքից բաղկացած ցանկ, որն ավելի հեշտ կդարձնի նվիրողի գործն ու կրկնակի հաճելի նվեր կդառնա ստացողի համար:

«Զանգակ» գրատունն այս տարի ևս պատրաստել է անակնկալներ գիրք նվիրելու օրվա առթիվ՝ իհարկե, չմոռանալով նրանց, ովքեր մասը կդառնան «Գաղտնի Թումանյան»֊ի․ այսօր արդեն այն սպասված գրքային տոն է նաև «Զանգակ»-ից դուրս: