11-րդ դասարանում «Երաժշտություն» առարկան աշակերտներին հիմնականում կուղղորդի դեպի հայ երաժշտության ոլորտ, որն իր զանազան ճյուղերով ու անհատներով էական ներդրում ունի համաշխարհային երաժշտության մեջ։ Ժամանակագրական իմաստով հայ կոմպոզիտորական երաժշտությունն ավելի ուշ է սկսել իր քայլերը, քան եվրոպականը։ Սակայն միևնույն ժամանակ հայ ժողովրդական, գուսանաաշուղական և հատկապես հոգևոր երաժշտությունը դարերի ավանդույթներ է մեզ փոխանցել։ Հայաստանում կոմպոզիտորական երաժշտության ի հայտ գալու հետ հետաքրքիր կամուրջ է ձևավորվել այդ ավանդույթների և եվրոպական դասական երաժշտության ձեռքբերումների միջև։ Որո՞նք են այդ կամուրջները։ Ի՞նչ առանձնահատկություններ ունի հայ կոմպոզիտորական երաժշտությունը։ Ի՞նչ է այն քաղել եվրոպական դասական և ի՞նչ հայ ավանդական երաժշտությունից։ Որքանո՞վ կարող է էական լինել անհատի ներդրումը երաժշտության զարգացման հունը հիմնովին փոխելու համար։ Այս և բազմաթիվ այլ հարցերի պատասխանները կստանաք՝ ծանոթանալով դասագրքին։ 11-րդ դասարանում աշակերտները հնարավորություն կունենան նաև իրականացնելու նոր նախագծային աշխատանքներ։ Իսկ հայ երաժշտության շուրջ բազմաբովանդակ քննարկումները կօգնեն թե՛ ճանաչելու ու արժևորելու հայ երաժշտությունը, թե՛ համեմատությունների միջոցով պատկերացնելու համաշխարհային երաժշտության հետ փոխառնչությունները։