«Մեր անհաջողության պատճառների եւ մարտահրավերների մասին» մենագրությունում փորձ է արվում 2020 թվականի Քառասունչորսօրյա պատերազմից հետո հայ հասարակությանը հուզող որոշ կարևոր հարցերի պատասխանները գտնել: Հարցերից մեկ այն է, թե ինչու՞ պատերազմը բռնկվեց հենց 2020 թվականի սեպտեմբեր ամսին և որո՞նք էին պատերազմում կրած անհաջողության պատճառները: Ներկայացվում են այդ առումով վճռական ազդեցություն ունեցած նյութական և ոչ նյութական, ինչպես նաև արտաքին քաղաքական գործոնները։ Մյուս հարցն այն է, թե ինչպե՞ս էր Հայաստանը պատրաստվել պատերազմին և անկախության տարիներին արվե՞լ էր, արդյոք, այն ամենը, ինչն անհրաժեշտ էր երկրի տնտեսական զարգացման և այդմիջոցով՝ անվտանգության մարտահրավերներին պատրաստ լինելու համար: Այդ առումով շեշտադրվում է արվում հատկապես մեր երկրում անկախության տարիներին կատարված բարեփոխումների և դրանց արդյունքում կառուցված ինստիտուտների վրա։ Եվ վերջապես հարցերից երրորդը վերաբերում է ներկայումս մեր դեմ ուղղված մարտահրավերներին և դրանց արձագանքելու հնարավոր միջոցներին: Տվյալ համատեքստում մասնավորապես ներկայացվում է այն տեսական հենքը, որի կիրառումը կարող է ապահովել երկրի զարգացման անհրաժեշտ ընթացքը։ Գրքում ներկայացված վերլուծությունն ընթերցողին հավանաբար կստիպի խորհել վերջին տասնամյակներում մեր երկրի անցած ճանապարհի մասին և կօգնի նրան թարմ հայացք նետել մեր հասարակության համար առանցքային նշանակություն ունեցող մի շարք խնդիրների վրա: Վերլուծությունում օգտագործվել է քաղաքագիտությանը, միջազգային հարաբերությունների տեսությանն ու ինստիտուցիոնալ տնտեսագիտությանն առնչվող գործիքակազմ և ընդգրկուն վիճակագրություն։ Գրքում ներկայացված վերլուծությունը կառուցված է ապաքաղաքական հենքի վրա։ Ես խուսափել եմ ներքաղաքական խնդիրների անձնավորումից։ Չեմ մտել Քառասունչորսօրյա պատերազ¬մից անմիջապես հետո ծավալված բանավեճերի դաշտ և քաղաքական որևէ ուժին պաշտպանելու կամ քննադատելու նպատակ չեմ հետապնդել։ Ես նաև չեմ շոշափել Լեռնային Ղարաբաղի հակամարտության և նրա կարգավորման տարբերակների հետ կապված մանրամասները։ Այս գիրքը Լեռնային Ղարաբաղի հակամարտության մասին չէ։ Իմ վերլուծության մեջ ես կենտրոնացել եմ մինչև 2020 թվականը կատարված իրադարձությունների և վիճակագրական տվյալների վրա, և ըստ ստացված եզրահանգումների՝ փորձել եմ գտնել վերոնշյալ հարցերի պատասխանները։