Կարո՞ղ է արդյոք մեքենան մարդկային զգացմունքներ ունենալ։ Ավելին, կարո՞ղ է արդյոք այն մարդուց ավելի մարդկային լինել։ Կլարան և արևը պատմություն է խճճված ու բարդ մարդկային զգացմունքների աշխարհում հայտնված արհեստական բանականության և անշահախնդիր սիրո, անմնացորդ նվիրումի ու անկեղծ ընկերության մասին։ Կազուո Իշիգուրոյի «Կլարան և արևը» պատմում է արտասովոր խորաթափանցությամբ և անսահման կարեկցանքով լի արհեստական մտերիմի՝ Կլարայի մասին։ Արհեստական բանականությամբ մեքենան, որի առաքելությունն է կատարյալ ընկերակից լինելը, իր օրերն անցկացնում է խանութի ցուցափեղկում՝ դիտելով աշխարհը ու երազելով մարդու հետ առանձնահատուկ կապի ու նվիրումի մասին։ Կլարայի կյանքը անսպասելիորեն փոխվում է, երբ նրան ընտրում է բարեսիրտ ու փխրուն դեռահաս Ջոզին։ Նրա աչքերով Կլարան ճանաչում է մարդկային զգացմունքների անկանխատեսելի ու խճճված բնույթը, հասկանում, թե ինչ է սերը և ինքնազոհաբերումը։ «Կլարան և արևը» անհավատալիորեն գեղեցիկ պատում է այն մասին, թե ինչ ասել է ապրել, սիրել ու հուսալ գեղեցկությամբ ու ցավով լի մարդկային աշխարհում։ Նոբելյան մրցանակակիր Կազուո Իշիգուրոյի «Կլարան և արևը» գիտաֆանտաստիկ և հակաուտոպիական տարրերով վեպ է՝ նախատեսված ընթերցողների լայն շրջանակի համար։ Այն քննարկում է մարդու և տեխնոլոգիաների, արհեստական բանականության և դրա ապագայի հարցերը։