Սիրով հրավիրում ենք հայ ականավոր գրող Գրիգոր Պըլտենի հետ հանդիպման, որի ընթացքում քննարկելու ենք վերջերս ԱՐԻ գրականության հիմնադրամի հրատարակչությամբ լույս տեսած երկու գրքերը՝ Գրիգոր Պըլտեանի՝ «Դէպի մէծ փոխաբերութիւն» վեպը և «Ձայնը գրեթէ. զրոյցներ Գրիգոր Պըլտեանի հետ» գիրքը որտեղ ներառված է երեք զրույց արձակագիր Արամ Պաչյանի և Գրիգոր Պըլտեանի միջև։ Զրույցը Գրիգոր Պըլտեանի հետ կանցկացնի Արամ Պաչյանը։
Ողջունելի կլինի եթե քննարկման ներկաները ընթերցած լինեն Գրիգոր Պըլտեանի այս, ինչպես նաև այլ ստեղծագործություններ։
Գրքերի մասին
Գրիգոր Պըլտեանի «Դեպի մէծ փոխաբերութին» գիրքը առաջին անգամ լույս է տեսել Փարիզում՝ 1999 թվականին. մերձավորապես խոհական ուղեգրություն է, որը ներքուստ դիմադրում է ժանրային որևիցե հանրածանոթ կաղապարներին։ Եվ սա անշուշտ բնորոշ է Պըլտեանի գրականությանը, նրա խոհաշխարհին։ Ահա, 1990-ականներն են. պատմողը այցելում է նորանկախ Հայաստան` (վերջապես ջանանք պատմողին զատել հեղինակից) և գրքում եկվոր-պատմողը, որ ներհայողն է, ականատեսը փլատակներից ծիլեր տվող պետականության՝ ժամանակի ու պատմության բեկումնային շրջադարձերի, հայության, սփյուռք-հայաստանյան ինքնությունների ու դժվարին իրողությունների հետևանքներն է անդրադարձնում։
Վերջին 15 տարիների ընթացքում Արամ Պաչյանի և Գրիգոր Պըլտեանի միջև կայացել են զրույցներ, որոնց առանցքը Պըլտեանի գրականությունն է, ինչպես նաև պատմությունը, ժամանակը, գրարվեստը, ավանդույթը և արդիությունը։ Այս զրույցները հրատարակվել են «Ձայնը գրեթէ. զրոյցներ Գրիգոր Պըլտեանի հետ» խորագրի ներքով։
Գրքերը հրատարակել են ԱՐԻ գրականության հիմնադրամի կողմից, Գալուստ Կիւլպէնկեան հիմնարկության աջարկցությամբ։
Միջոցառման ընթացքում նաև առաջին անգամ ներկայացվելու է Արիկ Գրիգորյանի «Շարունակելի,Շարունակական» նախագծի շրջանակներում հեղինակած երգը՝ Գրիգոր Պըլտեանի Մանտրաների խոսքերով։Արիկ Գրիգորյանը Բամբիռ խմբի անդամ է, Թմբաթա և Վիշապ խմբերի հիմնադիրն ու գեղարվեստական ղեկավարը։
Վերադառնալ