Սեպտեմբերի 30-ին՝ ժամը 15:00-ին, «Զանգակ» գրատան Աբովյան մասնաճյուղում տեղի կունենա Հայաստանում հեղինակային իրավունքի խնդիրների թեմայով հանդիպում իրավաբան Կարոլինա Հարությունյանի հետ:
Հանդիպման ժամանակ իրավաբան Կարոլինա Հարությունյանը կանդրադառնա այն հարցերին, թե ինչ է հեղինակային իրավունքը, ինչ բնույթի պաշտպանություն է ենթադրում, որ օբյետկներն են ենթակա պաշտպանության հեղինակային իրավունքի նորմերով և երբ է հեղինակն ունենում ստեղծագործության նկատմամբ հեղինակային իրավունք:
Ունկնդիրներին կներկայացվեն հեղինակի անձնական գույքային և անձնական ոչ գույքային իրավունքները: Քանի որ հանդիպման հիմնական նպատակը գրող-ստեղծագործողներին և գրական ոլորտում գործունեություն իրականացնող սուբյեկտներին հեղինակային իրավունքների մասին իրազեկելն է, առանձնակի ուշադրության կարժանան գրական ստեղծագործության նկատմամբ իրավունքների փոխանցումը կամ օգտագործման իրավունքի տրամադրումը այլ անձանց:
Կքննարկվեն, թե ինչպես է պետք առավել արդյունավետ կնքել հեղինակային պայմանագիր, ո՞ր իրավունքները հեղինակը կարող է օտարել, իսկ որոնք են անօտարելի, ինչպե՞ս և ի՞նչ ծավալով փոխանցել ստեղծագործության նկատմամբ իրավունքները և ինչպես որոշել վարձատրության հարցը, որի համատեքստում կներկայացվեն պայմանագրային որոշակի հմտություններ:
Միևնույն ժամանակ, ունկնդիրներին կներկայացվի հեղինակային իրավունքների հետ կապված հարակից իրավունքների բովանդակությունը՝ ստեղծագործության պաշտպանության վերաբերյալ առավել ընդգրկուն պատկերացում կազմելու համար:
Վերադառնալ