Գենետիկ տրավմատիկ հիշողություն

Ապրիլի 23-ին՝ ժամը 19։00-ին, «Զանգակ» գրատանը տեղի կունենա քննարկում «Գենետիկ տրավմատիկ հիշողություն» թեմայով:
Քննարկումը կվարի լրագրող, մեկնաբան Անի Ավետյանը: Դասախոսության բանախոսներն են՝ «Հրանտ Դինք» հիմնարկի նախագծերի համակարգող Արմենուհի Նիկողոսյանը, ԵՊՀ արևելագիտության ֆակուլտետի դեկան, պատմական գիտությունների դոկտոր, պրոֆեսոր Ռուբեն Մելքոնյանը, թուրքագետ, Հրանտ Դինքի ընկեր Տիրան Լոքմագյոզյանը։

ԹԵՄԱՅԻ ՄԱՍԻՆ
Newmag & Friends ծրագրով հրատարակչությունը ներկայացնում է «Հրանտ Դինք» հիմնարկի փաստավավերագրական բացառիկ ժողովածուն։
«Հրանտ Դինք» հիմնարկը հավաքել է Թուրքիայի ու արտագաղթած հայերի վկայությունները՝ ցեղասպանությունից հետո այնտեղ ապրելու, ինքնությունը,  հավատը, մշակույթը և լեզուն պահպանելու դժվարությունների մասին։ Բռնի կրոնափոխ եղած, իրենց ակունքներին վերադարձող կամ այդպես էլ որպես ծպտյալ հայ ապրող մարդկանց պատմություններ, որոնց միջոցով ամբողջանում է կոլեկտիվ հիշողության խճանկարը՝ մխրճվելով համակեցության մեջ։

Թուրքիայի հայերի երբևէ չպատմված պատմություններն ամփոփվել են «Լռության ձայնը» քառահատորյակում՝ «Խոսում են Թուրքիայի հայերը», «Դիարբեքիրի հայերը», «Անկարայի հայերը», «Սիվասի հայերը»: Շարք, որ կարող է դառնալ Թուրքիայի արխիվի մի մասը ու հայերի հիշողության մատյանը։

• Ապրիլի 23՝ 19:00
• Աբովյան 7, «Զանգակ» գրատուն
• Մուտքն ազատ է։