Ովքե՞ր կարող են խաղալ Խաղը ունի կանոնների պարզ և պարզեցված տարբերակներ, որոնք նախատեսված են՝ 1. Պարզ – 3+ երեխաների համար, ովքեր կարողանում են կարդալ կամ ում հետ խաղում է կարդալ իմացող մասնակից, 2. Պարզեցված – կարդալ չիմացող 3+ երեխաների համար, ովքեր կարող են պարզապես նետել զառը և քարտեզով առաջ գնալ՝ առանց առաջադրանքները կատարելու: Ի՞նչն է զարգացնում խաղը  զարգացնում է ստեղծագործական մտածողությունը,  զարգացնում է շփման հմտությունները,  զարգացնում է լեզվամտածողությունը,  զարգացնում է բարդ իրավիճակներում արագ լուծումներ գտնելու ունակությունը,  միջոց է տառերի այբբենական հերթականությանը ծանոթանալու և սովորելու համար: Խաղի կանոնները (պարզ տարբերակ) Խաղը սկսվում է, երբ խաղի մասնակիցներն իրենց նախընտրած խաղաքարը կանգնեցնում են մեկնարկի Ա դաշտի վրա: Առաջինը սկսում է մասնակիցներից ամենափոքր տարիք ունեցողը, իսկ մնացած մասնակիցները կշարունակեն՝ ըստ տարիքի աճման սկզբունքի, հերթականությամբ: Խաղաքարի գույնը ևս ընտրում ենք նույն սկզբունքով: Խաղի ընթացքում խաղաքարտերը պետք է դնել փակ վիճակում այնպես, որ գրված առաջադրանքները չերևան: Մասնակիցների հերթականությունը որոշելուց հետո առաջին մասնակիցը նետում է զառը, ապա ընտրում խաղաքարտերից որևէ մեկը՝ առաջադրանքը կատարելու համար: Մասնակիցը զառը նետելուց հետո քարտեզի վրա քայլում է առաջ, եթե կատարել է խաղաքարտի վրա գրված առաջադրանքը, իսկ եթե ոչ, ապա քայլ չի կատարում: Խաղի հաղթողը կարող է որոշվել 2 սկզբունքով՝ 1. հաղթում է եզրագծին՝ Ֆ տառին առաջինը հասած կամ անցած մասնակիցը: Եթե անգամ առաջադրանքներով խաղաքարտերից բոլորը բացվել են, միևնույնն է, խաղը շարունակվում է, մինչև որևէ մեկը կհասնի վերջին տառին: 2. երբ ավարտվում են առաջադրանքներով խաղաքարտերը, հաղթում է քարտեզի վրա ավելի բարձր նիշով դաշտի վրա կանգնած մասնակիցը: