Ուսումնաօժանդակ ժողովածուն նախատեսված է 4-րդ դասարանի սովորողների ավարտական ստուգմանը նախապատրաստվելու, ձեռք բերած գիտելիքների ու կարողությունների ստուգման, ամրապնդման և ինքնագնահատման համար։ Ժողովածուն ներառում է 15 հարցարան՝ «Մայրենի», «Մաթեմատիկա» և «Ես և շրջակա աշխարհը» առարկաներից։ Առաջադրանքներն ուղղված են սովորողների կարդալու, գրելու, վերլուծելու, համադրելու և մտքերն ազատ արտահայտելու կարողությունների ստուգմանն ու զարգացմանը։ Հարցարաններից հետո ներկայացված են առաջադրանքների պատասխանները՝ ինքնաստուգման, ինչպես նաև առարկաների վերջնարդյունքների հիման վրա կազմված ինքնագնահատման աղյուսակները։ Սովորողները կարող են գնահատել իրենց պատրաստվածությունը՝ նշումներ կատարելով «Այո», «Մասամբ» կամ «Դեռ ոչ» սանդղակով։ Հարցարաններն ունեն ոչ միայն ստուգողական, այլև ուսուցողական նպատակ։ Դրանք կարող են կիրառվել ինչպես դասարանում՝ ուսուցչի ուղղորդմամբ և համատեղ քննարկումների միջոցով, այնպես էլ տանը՝ ինքնուրույն աշխատանքի համար։ Ինքնագնահատման բաղադրիչը սովորողին հնարավորություն է տալիս բացահայտելու իր ձեռքբերումները, գնահատելու ուսումնառության արդյունքները և նկատելու այն ուղղությունները, որոնց շուրջ դեռևս լրացուցիչ աշխատանքի կարիք կա։ Ժողովածուն կարող է կիրառվել տարրական դպրոցի ավարտական ստուգմանը նախապատրաստվելու, ուսումնական արդյունքներն ամփոփելու և սովորողների ինքնուրույն ուսումնառության ու ինքնագնահատման հմտությունները զարգացնելու նպատակով։