«Հայրիկն ու Աղվեսիկը» գիրքը հրատարակվել է «Աղվեսիկ» մանկական ծրագրի շրջանակում, որի նպատակն է ստեղծել միջավայր, որտեղ հայկական մշակույթն ու արժեքները երեխաներին կմատուցվեն իրենց լեզվով՝ ժամանակակից, գունեղ ու հետաքրքիր: նիրքը նվիրված է Հայրիկ Մուրադյանի ծննդյան հոբելյանին՝ նպատակ ունենալով հանրայնացնել նրա մանկական երգարվեստը՝ մանուկների համար հասանելի, գրավիչ ու ժամանակակից ձևով։ Այն միավորում է երաժշտությունը, գրականությունը, տեսողական արվեստը և կենդանի ելույթներ՝ ստեղծելով նորարարական մշակութային-կրթական մոդել։ Գրքի առանցքը Հայրիկի, իր սաների ու Աղվեսիկի կերպարների փոխհարաբերությունն է՝ հեքիաթային ու երաժշտական միջավայրում։ Հայրիկ Մուրադյանը իմաստուն, բարի պապիկ է, որն իր սաների հետ շրջում է երաժշտական այգով, որտեղ պտղատու ծառեր են երգ-մրգերով։ Նրանք նկատում են ձագուկ Աղվեսիկին և խաղալով ընկերանում նրա հետ։ Յուրաքանչյուր երգ դառնում է առանձին սյուժե Հայրիկի պատումներով՝ հումորային, շարժուն, ճանաչողական, և տրվում է երգի իմաստը, լեզուն, մշակույթը։ Իսկ երգը կատարում են մանուկները։ Մշակված է սցենար՝ ընդգրկելով 10 երգ, որոնց շուրջ կառուցվում են փոքրիկ պատմություններ՝ երկխոսություններով ու տեսարաններով։ Յուրաքանչյուր սյուժե մանուկին հուշում է լեզվական, մշակութային կամ խրատական միտք՝ օրինակ՝ եղբայրսիրության, ընտանիքի, չարաճճիության, հայրենաճանաչության և այլնի մասին։ Գիրքը երկլեզու է՝ հայերեն, անգլերեն։ Հայրիկ Մուրադյանի երգացանկից ընտրված 10 երգերը ծրագրի շրջանակում գործիքավորվել են ժամանակակից ձևաչափով՝ հարմարեցված մանուկներին։ Յուրաքանչյուր երգ հասանելի է ընթերցողին QR կոդի միջոցով՝ ձայնագրված և համադրված երկու տարբերակով․ 1. ամբողջական՝ վոկալով տարբերակ, պատանի կատարողների և մանկական ձայների մասնակցությամբ, 2. կարաոկե տարբերակ՝ առանց վոկալի, որը նախատեսված է երեխաների ինքնուրույն կատարման, ինչպես նաև մանկապարտեզներում, դպրոցներում ու այլ կրթական հաստատություններում իրականացվող միջոցառումների ժամանակ կիրառելու համար։ Երգերի բառերը հասանելի են նաև հայերեն տրանսլիտերացված տարբերակով, որպեսզի ոչ հայալեզու կատարողներին նույնպես մատչելի լինի։ Գիրքը ծառայում է որպես մշակութային կրթական գործիք, որն ապահովում է ընթերցանություն, ունկնդրում և երգեցողություն։