«100 տարի անց Ֆրիտյոֆ Նանսենի ոտնահետքերով» գրքի կառուցվածքը և բովանդակությունը կազմել է Ֆելիքս Բախչինյանը: Գիրք գրելու գաղափարը ծնվեց 2018 թվականին, երբ Ֆրիտյոֆ Նանսեն ինստիտուտի կողմից թարգմանվեց նորվեգացի գրող Էյվինդ Ռավնայի «Սիբիրով Նանսենի հետ» գիրքը։ Ֆրիտյոֆ Նանսենի բոլոր ճանապարհորդությունների մեջ 1925-ին Հայաստան կատարած այցը եզակի և բացառիկ է իր տեսակով: Նա այդ այցը կատարեց ոչ թե որպես գիտնական, ուսումնասիրող, այլ որպես մարդ և մարդասեր, որպես օտար ժողովրդի տառապյալ զավակներին ապրեցնելու նպատակի նվիրյալ։ 2025 թվականի հունիսի 17-ին լրացավ մարդկության՝ բոլոր ժամանակների մեծ անհատականությունների աստղաբույլի ամենապայծառ անուններից մեկի՝ նորվեգացի մեծ գիտնական, բևեռախույզ, դիվանագետ, մեծ մարդասեր, Խաղաղության Նոբելյան մրցանակի դափնեկիր և հայ ժողովրդի ազնիվ բարեկամ Ֆրիտյոֆ Նանսենի Հայաստան այցելելու 100-ամյա հոբելյանը։ Սա կարևոր իրադարձություն է ոչ միայն հայ ժողովրդի, այլև առհասարակ ողջ աշխարհի առաջադեմ մարդկության համար: Նանսենի՝ Հայաստան կատարած այցի պատմական հոբելյանը արժանահիշատակ առիթ է կրկին անդրադառնալ մեծ մարդասերի հայանպաստ գործունեությանը, նրա ծրագրերին և Հայաստանից ստացած տպավորություններին: Այս գիրքը Ֆրիտյոֆ Նանսենի և իր հանձնախմբի Հայաստան այցելության 100-ամյա վավերագրումն ու անվերջ շնորհակալությունն է մեծ մարդասերի անմնացորդ նվիրումին: