Երբ շրջապատված ես երեխաներով՝ նրանք քեզ իրենց հետ տանում են հեքիաթային աշխարհ: Ու քեզ էլ հիշեցնում, թե ինչ երևակայական աշխարհում էիր ապրում դու մանկության տարիներին: Այս հեքիաթը ծնվեց տարիներ առաջ, երբ փորձում էի քնեցնել մի հրաշք բալիկի: Նա ամեն անգամ պահանջում էր պատմել զեբրի և կոկորդիլոսի մասին: Ամեն անգամ պատմելիս մենք միասին էինք հեքիաթը գունավորում նոր իրադարձություններով: Հետո այս հեքիաթը լսեցին նաև այլ փոքրիկ հրաշքներ ու շատ սիրեցին: Սիրելի փոքրի՛կ, հուսով եմ դու էլ կսիրես Ջեմմիին ու Դեմբոյին և նրանցից կսովորես միայն լավն ու բարին: Հեքիաթում ալարկոտ և եսասեր Դեմբո զեբրը հանդիպում է երազկոտ ու լավատես Ջեմմի կոկորդիլոսին։ Ջեմմին իր բարության և նվիրվածության շնորհիվ կարողանում է արթնացնել անտարբեր Դեմբոյի իրականում բարի սիրտը, և նրանք դառնում են անբաժան ընկերներ: Գրքում կհանդիպես հետաքրքիր խաղերի և հանձնարարությունների: Գիրքը նվիրվում է իր առաջին փոքրիկ ունկնդիրներին՝ Մարկին, Պատրիկին, Մոնթեին և Նոյեին: Շնորհակալ եմ, որ դուք կաք: